^{گەلی خۆراگری کوردستان
کرێکاران و زەحمەتکێشانی سەربەرز
لەو کاتەوە کە کرێکارانی ئامریکا دەستیان دایە مانگرتن و رژانە سەر شەقامەکان و خوازیاری کەم کردنەوەی کاتژمێرەکانی کار بوون، ١٣٦ساڵ تێپەر دەبێت، لەو ماوەیەدا کرێکاران بۆ گەیشتن بە مافە بنەرەتی و سەرەکییەکان و هەروەها وەرگرتنی ئیمتیاز و خزمەتگوزاری زیاتر، مێژوویەکی خوێناویان نووسیوەتەوە، ئەمەش لە پێناو ئەوە بوو کە هیچ کرێکارێک لەجیهاندا رۆژێک نەچەوسێتەوە و مافەکانیان پارێزراو بێت. بەڵام مەخابن لەدۆخێک دا بەرەو یادی رۆژی جیهانی کرێکاران دەچین کە روانگەی دەوڵەتی ئێران سەبارەت بە دامەزراوە و رێکخراوەکانی داکۆکی لە مافی کرێکاران رووکەردی تەواو ئەمنیەتی و دژی کرێکاری هەیە. تا ئەو جێگایەی کە لە ماوەی ساڵانی رابردوودا هیچ مۆڵەتێکی فەرمی بە کرێکاران نەدراوە کە لە رۆژی ۱ی مای رێپێوانی هێمنانە و مافخوازانەیان بەرێوە ببن.}

^{ئەوە لە کاتێک دایە کەبە پێی مادەی ۲۷ی یاسای بنەرەتی ئێران، گردبوونەوە و رێپێوانی هێمنانە و مافخوازانەو دوور لە گرژی و بە بێ چەک کە هیچ دژایەتی نەبێت لەگەڵ بنەماکانی ئیسلام و تەناهی نەتەوەیی وڵات، رێگە پێدراوە، بەم پێیەش دەبینین کە نەبوونی ئەمنیەتی پیشەیی، راگرتن و نەدانی حەقدەست و کەمی کرێ لە ئاست کارکردنی زۆر و گرانی نرخی پێداویستییەکان بۆکرێکاران، هێشتاش بە رێژەیەکی بەرچاو درێژەی هەیە، و تەنانەت هێنانە ئارای داخوازی بۆ دروست کردنی سەندیکا و رێکخراوەگەلێکی سەربەخۆ کە تێیدا کرێکارانی ژن و پیاو ببنە ئەندام و چالاکی بنوێنن و داخوازیەکانیان بێنە گۆڕێ، تائەم کاتەش وەکوو سەرەتایی ترین خواستی رەوای کرێکارانی ئێران و رۆژهەڵاتی کوردستان بێ وڵام ماوەتەوە. داخوازیگەلێک کە لە سەردەمی رێژیمی پاڵەویش دا پشت گوێ خرابوون و تەنانەت ئەم بەربەست و لەمپەرانە بۆکرێکاران لەسیستەمی ئێستای کۆماری ئیسلامی ئێرانیش دا زەق و بەرچاون.
لەوانە: دەرکردنی کرێکاران بە شێوەی بەردەوام و بە هۆکاری ناروون لە لایەن خاوەن پیشەگەورەکان، راوەدوونان و شوێن کەوتن، خستنە ژێر چاوەدێری ئەمنیەتی، دەستبەسەر دەکردنی چالاکانی کرێکاری، دەرکردنی بریاری قورس و سەپاندنی سزای تووند و درێژماوە بەسەر کرێکاران دا، بەندکردن و دۆخی نالەباری گیراوانی کرێکاری لە گرتووخانەکانی ئێران دا، و هەڵسوکەوتی نادرست و نایاسایی، کۆمەڵە بابەتێکن کە مانگ به مانگ بەرەو هەڵکشان دەچن و پەرە دەستێنن. ئەو رەوشە لە رۆژھەڵاتی کوردستان بە هۆی دۆخی ناسەقامگیر، گوشاری ئەمنی و سەپاندنی فەزای ترس، هەرەشە و تۆقاندن چەندین بەرامبەر زیاترە، هەر بۆیەشە لە رۆژھەڵاتی کوردستان قورسترین سزاکان و زەخت و گوشار دەسەپێندرێت بەسەر کرێکاران و زەحمەتکێشان دا، ئەویش لەرووی هەڵاواردن و جیاوازیی هەرە گەورە دەبینرێت.}

^{پێویستە ئەوە لە بیر نەکەین کە چینی کرێکاران و زەحمەتکێشان، بەشێکی بەرچاوی کۆمەڵگای ئێران و کوردستان پێک دەهێنن، و تەواوی ئەو نادادپەروەری و سەپاندنی گوشارانە بەسەر کرێکاران و زەحمەتکێشان لە کوردستان لە ئەنجامی سیاسەتی جیاکاری، پەراوێزخستن و هەڵاواردن و چێ کردنی ئەتمۆسفێری تەناهی و نیزامی زاڵ لە لایەن دەسەڵاتەوە سەرچاوە دەگرێت: لەوانەش دیاردەی نامۆی کۆڵبەری کە لە هیچ قامووسێکی جیهان دا بوونی نییە و پیشەی شیاوی مرۆڤی کوردی ئازاد نەبووە و نییە، مەخابن بە هۆی دۆخی داسەپاو، بە شێوەی سیستماتیک و بەرنامە بۆ دارێژراو، بەداخەوە رۆژانە شایەتی کارەساتی جەرگبر و دژە مرۆییانەین، واتە کوشتنی کۆڵبەران و کاسبکارانی سنوور لەلایەن هێزە ئەمنیەتیەکانی ئێران بۆتە دیاردەیەکی تا بێژین ناخۆش، دڵتەزێن و ویژدان هەژێن کە راستەوخۆ پێکهاتەی گەرمی بنەماڵەکانی کورد دەکرێتە ئامانج.}

^{لە لایەکی تریشەوە کرێکارانی ژن و پیاو کە بە کەمترین حەقدەست ناچارن لە ئاست ئەو هەموو زەخت و گوشار، هەڵاوسان و گرانییەدا خۆراگری بکەن، و هاوکاتیش لەگەڵ گوشارێکی زۆر لە لایەن سیستەمی پیشەیی داسەپێنراو بەرەو روون، و هەروەها لە باری دەروونیشەوە بە هۆی دەستەبەر نەکردنی تەنانەت پێداویستییە سەرەتاییەکانی منداڵانەیان لەو پەڕی خەراپی دان.}

^{بزووتنەوەی کۆماریخوازانی رۆژهەڵاتی کوردستان لەگەڵ ئاراستە کردنی پیرۆزبایی بەبۆنەی1ی مای رۆژی جیهانی کرێکاران، مێژووی سەرکوت، سیاسەتی نادروستی خاوەن پیشەگەلی بەرزی ئابووری،بەرێوەبەری و دەسەڵات داران لە هەموو شوێنێکی جیهان لە دژی کرێکاران ئیدانە دەکات، بزووتنەوە باوەرمەندە بە «ئازادی و یەکسانی» چارەنووسی هاوبەش و گرێدراو و بێ جیاوازی لە کۆمەڵگای مرۆڤایەتی دا، و لە ئەگەری ئاشناکردنی هەمووان بە مافەکانی مرۆڤ،و هەروەها ئەگەر هەوڵ و تێکۆشانی گشت رەهەندی لەپێناو دەستخستنیان سڵ نەکەینەوە، بە دڵنیاییەوە ئەگەری وەدی هێنان و دەستەبەرکردنیان مسەوگەرو حەتمی دەبێ.}

1/5/2023