^{سیاسەتمەدارێکی کورد دەڵێت، دامەزراندنی کۆماری کوردستان ئەزموونێکی باش بوو بۆ ھەموو پارچەکانی کوردستان و دروستکردنی کیانێک بوو ھاوشێوەی کیانی ھەرێمی کوردستان، بەڵام تەمەنی کورت بوو، بۆیە پێویستە ئێستا ھەموو پارچەکانی کوردستان کیانی ئێستای ھەرێمی کوردستان بپارێزن .}

^{لە ٢٢/٢/١٩٤٦ لە مەیدانی چوارچرای مهاباد بە ئامادەبوونی ژمارەیەکی زۆری چینوتوێژەکان و نوێنەرانی کوردستان، ئاھەنگی ڕاگەیاندنی کۆماری کوردستان بە بەرزبوونەوەی ئاڵای کوردستان و سرودی نیشتمانی و سڵاوکردن لە ئاڵا دەستی پێ کرد و سەرکردە قازی محەمەد گوتارێکی پێشکەش کرد و باسی خەبات و داخوازییەکانی گەلی کوردی کرد، کە ٧٦ ساڵ بەسەر ئەو یادە مەزنەدا تێپەڕ دەبێت و بارزانیی نەمریش تێیدا بەشدار بوو و سەرۆکی لەشکر بوو و تا کۆتاییش کۆمارەکەی پاراست.}

^{لەم بارەیەوە دکتۆر مەحموود عوسمان، سیاسەتمەداری کورد، بۆ ماڵپەڕی فەرمیی پارتی دیموکراتی کوردستان گوتی: ''ئەوە یادێکی پیرۆزە لای ھەموو گەلی کورد، چونکە دامەزراندنی کیانێکی نەتەوەیی بوو و خەڵکی کوردستان لە پارچەکانی دیکەش تێیدا بەشدار بوون و بارزانیی نەمر و بارزانییەکانیش بەشدارییان تێدا کرد، بەڵام بەداخەوە تەمەنی کورت بوو، چونکە بە تەنھا مانەوە و سەرۆکەکەیشی، قازی محەمەد، بۆ ئەوەی میللەتەکەی تووشی کوشتار نەبێت خۆی ڕادەست کرد و خۆی و کۆمەڵێک لە سەرکردەکان لەسێدارە دران و یادیان ھەر بەزیندوویی دەمێنێتەوە.''}

^{دکتۆر مەحموود عوسمان گوتیشی: ''کۆماری کوردستان لە مهاباد یادێکی پرشنگدار و گرنگە بۆ ھەموو کوردستانیان، چونکە کیانێک بووە و ویستراوە قەوارەیەک بۆ کورد دروست بکرێت، بەڵام ڕێگە نەدرا سەر بگرێت، بۆیە ھەموو کوردێک شانازیی پێوە دەکات.''}

^{مەحموود عوسمان ڕوونیشی کردەوە: ''بارزانیی نەمر و چەکدارەکانی ڕۆیشتن بۆ مهاباد و لەوێ سەرۆکی لەشکر بوو و بارزانییەکان ڕۆڵێکی کاریگەریان ھەبوو بۆ پاراستنی کۆمارەکە تا کۆتاییی پێ ھات و دواتر ناچار بوون بکشێنەوە و ڕۆیشتن بۆ سۆڤیەت و نەگەڕانەوە بۆ عێراق.''}

^{گوتیشی: ''ئەوەی کرا ئەزموونێک بوو و سوودیشی لێ وەردەگرن، بەڵام بێگومان ھەرێمی کوردستان کە ھەیە لە زەمەنێکی دیکەدایە و پێویستە ھەموو پارچەکانی کوردستان حیسابی بۆ بکەن و بیپارێزن، چونکە لە ھەر پارچەیەک دەستکەوتێک ھەبێت، یاخود ئەزموونێک ھەبێت، سوودی بۆ بەشەکانی دیکەش دەبێت، بۆیە بوونی ھەر کیانێکی کوردی گرنگیی زۆری بۆ ھەموو گەلی کورد ھەیە''.}

^{بڵند ئیبراھیم}

22/1/2022