(2).jpeg)
بەرێزان سەرکردایەتی حیزبی دێموکراتی کوردستانی
ئێران!
هەواڵی کۆچی دووایی کەسایەتی تێکۆشەر و پێشمەرگە و ئەندامی سەرکردایەتی حیزبی دێموکراتی کوردستانی ئێران کاک لوقمان مێهفەر، کە جێگای رێز و خۆشەویستی گشت لایەکمان بوو، بوو بە مایەی خەمباری و دلگرانیمان.
بزووتنەوەی کۆماریخوازی رۆژهەڵاتی کوردستان کۆچی دوایی کاک لوقمان مێهفەر تێکۆشەری دێرین و کەسایەتی خۆشناو و ئەندامی سەرکردایەتی حدکا وەک سیمایەکی ناسراوی سیاسی و نەتەوەیی و شۆرشگێری و یاساناس کە شوێنپەنجەی بە سەر زۆر بابەتی گرنگ و چارەنووسازی مێژووی رۆژهەڵاتی کوردستان و حیزبی دێموکراتەوە دیار و بەرچاوە وەک خەسارێکی گەورە و قەرەبوونەکراوە دەنرخێنێت. بۆیە بە کۆچی ناوەختی گشت لایەکی تووشی شوک و هەژاندن کرد. لەم پەیوەندییەدا بزووتنەوەی کۆماریخوازانی رۆژهەلاتی کوردستان سەرەخۆشی لە گەلی کوردی هێژا و تێکۆشەر و سەرکردایەتی حیزیی دێموکراتی کوردستانی ئێران و بنەماڵەی گەورەی دێموکرات و سەرجەم بنەماڵەی تێکۆشەر و کەس و کاری خوالێخۆشبوو و گشت دۆستان ئاراستە دەکات، خۆی بە شەریکی غەم و پەژارەیان دەزانێت.
هیوادارین هەرچی زووتر ڤایرۆسی نەگریسی کرۆنا بەرۆکی مرۆڤایەتی بەربدات و ژیان و گوزەران بۆ خەڵک ئاسایی ببێتەوە، داواکارین لە هەموو کوردستانیانی ئازیز کە ئەوپەڕی خۆپارێزی و رێنماییەکانی تەندروستی لەبەرچاوبگرن و لە یارمەتی هەژاران و دەستکورتان و خەڵکانی کەم درامەت و نەخۆشەکان درێغی نەکەن.
لە کۆتایی دا لە خودای گەورە داواکارین، روحی کاک لوقمان مێهفەر ئەو کەسایەتییە ئازادیخواز و وڵاتپارێزە مەزن و خۆشەویستە بە بەهەشتی بەرین شاد بکات و ئەزیزان و هاورێ و هاوسەنگەر و گەلەکەمان لە بەلا و مووسیبەتی عەرزی و ئاسمانی بەدوور رابگرێ.
یادی سەرجەم سوور خەڵاتانی رێگای رزگاری کورد و کوردستان هەرمان و رێگای تێکۆشانیان پڕ رێبوار بێت.
إِنَّا لِلَّٰهِ وَإِنَّا إِلَيْهِ رَاجِعُونَ
دەگەل رێزمان
بزووتنەوەی کۆماریخوازی رۆژهەڵاتی کوردستان
۲۱ی خاکەلێوەی ۲۷۲۱ی کوردی/۱۴۰۰ی هەتاوی
۱۰ی ئاپرێڵی ۲۰۲۱ی زایینی
