^{وەزارەتی دەرەوەی ئێران پشتڕاستی کردەوە کە بەرپرسانی باڵای ئەو وەزارەتە لەگەڵ نوێنەرانی گرووپی تیرۆریستیی تاڵیبان لە تاران کۆ بوونەتەوە.}

^{بەهرام قاسمی، گوتەبێژی وەزارەتی دەرەوەی ئێران، لە پرێس کۆنفرانسێکدا ڕای گەیاند: "روژی یەکشەممە 2018.12.30 چەند نوێنەرێکی گرووپی تاڵیبان هاتوونەتە ئێران لەگەڵ عەباس عێراقچی، جێگری سیاسیی وەزارەتی دەرەوە دیدار و گفتوگۆیان کردووە".}

^{قاسمی ئاماژەی بەوەش کردووە: "ئەو گفتوگۆ و دیدارانە بە ئاگاداریی حکوومەتی ئەفغانستان ئەنجام دراون."}

^{پێشتر عەلی شەمخانی، سکرتێری ئەنجومەنی باڵای ئاسایشی نەتەوەیی ئێران، سەرەڕای پشتڕاستکردنەوەی گفتوگۆ لەگەڵ گرووپی تاڵیبان لەناو خاکی ئەفغانستان، گوتبووی ئەو وتووێژانە بە ئاگاداریی دەوڵەتی ئەفغانستان جێبەجێ کراون و درێژەشیان دەبێت".}

^{ئاشکراکردنی پەیوەندییەکانی نێوان گرووپی تیرۆریستیی تاڵیبان و تاران، لە کاتێکدان لە ساڵانی ڕابردوودا چەندین ڕاپۆرت لەبارەی دیداری تاڵیبان و بەرپرسانی سیاسی و سەربازیی ئێران و مەشق و ڕاهێنان بە گرووپی تاڵیبان لەناو خاکی ئێران بڵاو کرانەوە، بەڵام ئێران ئاشکرای کرد کە تاڵیبان لە ڕوانگەی ئەوانەوە گرووپێکی تیرۆریستییە و ئەو هەواڵانە دوورن لە ڕاستییەوە.}

1/1/2019