^{مایک پۆمپیۆ، وەزیری دەرەوەی ئەمەریکا، لێدوانێکی جەواد زەریف، وەزیری دەرەوەی ئێران، بە درۆ دەخاتەوە و دەڵێت، ئەمەریکا سزای خەڵکی ئێران نادات.}

^{پێشتر جەواد زەریف بە سوود وەرگرتن لە چەند میدیایەک کە هەواڵێکییان لەبارەی هەوڵەکانی ئەمەریکا بۆ برسیکردنی خەڵکی ئێران بڵاوکردبوەوە رایگەیاندبوو: "پۆمپیۆ بە ئاشکرا دەیەوێت هەڕشەی برسیکردنی خەڵکی ئێران بکات کە ئەوە تاوانێکی دژ بە مرۆڤایەتییە".}

^{لە وەڵامدا، پۆمپیۆ لە تویتێکدا زەریف بە درۆن ناودەبات و دەڵێت: "شەرمەزاری بۆ میدیا ساختەکان کە یارمەتی جەواد زەریف دەدەن درۆکانی بڵاوبکاتەوە".}

^{دەشڵێت: "ئەمەریکا هەرگیز ئابڵووقە ناخاتە سەر خواردن و دەرمان، بەهۆی ئەوەی ئەوانە پێدوایستی مرۆڤن، بەشێک نابن لە سزاکان".}

^{لەگەڵ سەپاندنی سزا نەوتییەکانی سەر ئێران، بەرپرسانی کۆماری ئیسلامی ئێران ئەمەریکایان بە برسیکردنی خەڵکی ئێران تۆمەتبارکرد، ئەمەریکاش رەتیدەکاتەوە و دەڵێت، ئامانجی سزاکان سنووردارکردنی کارە "تیرۆرستییەکانی" ئێرانە لە رۆژهەڵاتی ناوەڕاست.}

12/11/2018