^{بەهۆی ژەهراویبوونی ئاوی خواردنەوەی گوندی دریازی مەهاباد ١٠٠ کەس نەخۆش کەوتن و ڕەوانەی نەخۆشخانە کران.}

^{ڕۆژی پێنجشەممە ڕێکەوتی ٣ی خەزەڵوەری ١٣٩٧ی هەتاوی، بە هۆی پیسبوونی ئاوی خواردنەوەی گوندی دریاز، سەر بە شاری مەهاباد ١٠٠ کەس لە دانیشتوانی ئەو گوندە ڕەوانەی نەخۆشخانە کران.}

^{کاربەدەستانی ڕێژیمی ئێران باسیان لەوە کردووە، بە هۆی ئەوەی کە ئاوی ئەو گوندە لە چەندین کانی و چاڵاوی قووڵ دابین دەکرێت، ئەگەری ئەوە هەیە ئاوەکە پیس ببووبێت.}

^{لە دوای ئەو ڕووداوە، خەڵکی گوندی دریاز ئاگادار کراونەتەوە کە نابێت کەڵک لەو ئاوە وەربگرن و کاربەدەستانی ڕێژیمی ئێران بە تانکەری ئاو، ئاوی خواردنەوەیان بۆ دابین دەکەن.}

^{زۆربەی گوندەکانی کوردستان ئەگەرچی ئاوی لوولەکێشیان هەیە، بەڵام سەرچاوەی ئاوەکانیان سرووشتییه و بە شێوەی ستاندارد ئاوی خواردنەوەی گوندەکان دابین نەکراوە.}

^{لە لایەکی دیکەوە ئێران قەیرانی ئاوی خواردنەوەی هەیە و ڕێژیمی ئێران ئاوی کوردستان بۆ شارە ناوەندییەکانی ئێران دەگوازێتەوە و زۆربەی گوندەکانی کوردستانیش له ئاوی لوولەکێشی بێبەشن.}

^{چوونەسەری ٦ لەسەدی گەرمی هەوا، کەمبوونەوەی ڕێژەی بارینی باران، کەمبوونەوەی ئاوی بەنداوەکان بەڕێژەی ٥٠%، ڕێگری کردن لە پڕبوونەوەی سەرچاوە ئاوییە ژێرزەوینییەکان و دەیان هۆکاری دیکە دەری دەخەن کە ئێران لە سنووری قەیران تێپەڕیوە و تا ماوەیەکیتر قەیرانی مرۆیی ڕوو دەدات.}

^{بەپێی ڕاپۆرتەکان ٥٧ بەنداوی ئێران، ئاویان تێدا نەماوە و ڕێژەی ئاوانەی کە دەڕژێنە ناو بەنداوەکان بە بەراورد لەگەڵ ساڵی ڕابردوو ١٥ لەسەد کەم بووەتەوە.}

26/10/2018