^{نوێنەری شاری ورمێ، لە مەجلیس ئیدعای ئەوە دەکات، کە هەرێمـی کوردستانی عێراق، بە "پارەی عەرەبستان و کەرەستەی ئامریکایی" حیزبە کوردییەکانی کوردستانی ئێران تەیار دەکات.}

^{نادر قازیپوور، نوێنەری شاری ورمێ لە مەجلیس، ڕۆژی یەکشەممە ١١ی خەرمانان، لە کۆبوونەوەی ئاشکرای مەجلیس، هەرێمی کوردستانی عێراقی بە هەوڵی "دژە ئەمنییەتی کۆماری ئیسلامیی ئێران" تاوانبار کرد و ڕایگەیاند: "هەرێمی کوردستان بە پارەی عەرەبستان و چەکوچۆڵی ئامریکایی گرووپەکانی دژبەری شۆڕش بە دەستی حیزبی دێموکراتی بارزانییەکان بە دژی کۆماری ئسیلامیی ئێران تەیار دەکات. ڕێبەرانی هەرێمی کوردستان بە سەردانکردنی وڵاتی عەرەبستان، ئامریکا و ئیسرائیل دژی کۆماری ئیسلامیی ئێران هەوڵەکانیان لە ڕاستای پشتیوانی گرووپە دژبەرەکانی شۆڕش لە بەرنامەی کاری خۆیان داناوە".}

^{ناوبراو ئیدعا دەکات کە: "دەرکردنی کارتی نیشتەجێبوون لە هەرێمی کوردستان بە واستەی گرووپە تێرۆریستییەکانی دژە شۆڕش ئەنجام دەدرێت، خاکی هەرێمی کوردستان بووەتە جێگای گرووپە تێرۆریستییەکان. پشتیوانی هێندێک لە بەرپرسان بۆ دروستکردنی بنکەی نوێ و پشتگوێخستنی ئەمنییەتی خاکی کۆماری ئیسلامیی ئێران، لە لایەن ڕێبەرانی هەرێمـی کوردستان بووە".}

^{قازیپوور ئەو لێدوانانەی لە ڕەوتی پرسیار و وڵام لە محەممەدجەواد زەریف وەزیری کاروباری دەرەوەی ئێرانی کرد و ڕوو لە زەریف ڕایگەیاند: "جەنابی زەریف، داوا لە ئێوە دەکەم بە شێوەی قورس و قایم پیلانەکانی ئەو هەرێمە لە بناغەوە پووچەڵ بکەنەوە.}

^{بە دەستپێکردنی چالاکییەکانی حیزبە کوردییەکان لە کوردستانی ئێران، لە ساڵی ٩٥ی هەتاوی، چەندین جار بەرپرسانی باڵای حکوومەتی ئێران هەڕەشەیان لە هەرێمی کوردستانی عێراق کردووە.}

^{لە ئەدەبیاتی سیاسی و نیزامیی حکوومەتی ئیسلامیی ئێراندا، حیزبە کوردییەکانی ئۆپۆزسیۆنی بە "دژە شۆڕش" ناوزەد کراوە.}

6/9/2018