^{مانگرتن لە کارکردنی شۆفێری بارهەڵگرەکان لە ئێران لە ڕۆژی ٢٢ی ئایارەوە دەستیپێکردوە و ئەمڕۆ لە چوارەمین ڕۆژیدا بەردەوامە، مانگرتنەکە ڕۆژ لە دوای ڕۆژ بەرفراوانتر دەبێت.}

^{بارهەڵگرەکانی ئێران بە مەبەستی دەربڕینی ناڕەزایی بەرامبەر بە گرانبوونی پارچەی بارهەڵگر و هەروەها کەمبوونی کرێی ئەو بارهەڵگرانە مانیان لە کارکردن گرتووە و هاتووچۆ و گواستنەوە لە وڵاتیان تووشی کێشەی جدی کردووە.}

^{ئەو مانگرتنە لە ماوەی چوار ڕۆژدا سنووری دەیان پارێزگای ئێرانی تێپەڕکرد، لە هەندێک پارێزگادا بارهەڵگرەکانی گواستنەوەی سووتەمەنی و بەنزینیش بەشداری مانگرتنەکە بوون، ئەوەش وایکردووە بەنزین نەگات بە بەنزینخانەکان و هاوڵاتیان بەنزینیان دەستنەکەوێت.}

^{سوپای پاسداران بۆ قەرەبووکردنەوەی ئەو زیانانە، بارهەڵگرەکانی خۆی خستووەتە کار و سەرقاڵە بە گواستنەوەی سوتەمەنی بۆ بەنزینخانەکان.}

^{دوێنێ ژمارەیەکی زۆر لە شۆفێری پاسەکانی پارێزگای شیرازیش بەشداری مانگرتنەکە بوون.}

^{جێگای ئاماژەیە، بەگوێرەی ئامارەکانی وەزارەتی ڕێگاوبانی ئێران، ٣٦٠ هەزار بارهەڵگر لە ئێراندا هەن و ڕۆڵێکی گرنگ لە سیستمی گواستنەوە لە ئێراندا دەگێڕن.}

27/5/2018