(2).jpeg)
هاوسه‌رۆكی هه‌ده‌په له بانگه‌شه‌ی هه‌ڵبژاردنی پارته‌كه‌یدا له ئامه‌دی باكووری كوردستان، داوای پێكهێنانی هاوپه‌یمانی كوردی كرد بۆ ئه‌وه‌ی ده‌نگی كورد په‌رته‌وازه نه‌بێت و سه‌ركه‌وتن به‌ده‌ست بهێنن.
په‌روین بوڵدان هاوسه‌رۆكی پارتی دیموكراتی گه‌لان هه‌ده‌په له میانی بانگه‌شه‌ی سیاسی بۆ هه‌ڵبژاردنی پێشوه‌خته كه بڕیاره رۆژی 24-6-2018 ئه‌نجام بدرێت، له ئامه‌د گوتارێكی پێشكه‌شكرد. بوڵدان گوتی "لە بەرامبەری هاوپەیمانی ئاکپارتی و مەهەپە، ئێمەش وەک سەرجەم پێکهاتە کوردییەکان دەڵێن وەرن با هەموو پێکەوە دەست بخەینە نێو دەستی یەکدی و ئەو هاوپەیمانیێتییە پێکبهێنین کە خاڵی هەرە گرینگە لە گەیشتنمان بە ئازادی. هەموو دامەزراو و تاکێک کە هەست بە بەرپرسیارێتی دەکات نابێت لە دەرەوەی ئەو هاوپەیمانێتییە مێژووییە بمێنیتەوە".
هاوسه‌رۆكی هه‌ده‌په گوتیشی "ئێمەی کورد نەک لەبەر ئەوەی لاوازین، بەڵکو لەبەر ئەوەی پارچە پارچەین دوورین لە ئازادی. دەمەوێت ئاماژە بەم خاڵە گرینگە بکەم. گەلی کورد دەرکی بەوە کردووە کە کەرکووک و عەفرین، شرناخ و مەهاباد چارەنووسیان یەکە".
23/5/2018
