^{ڕێبەری باڵای کۆماری ئیسلامی ئێران لە کۆبوونەوەیەکدا لەگەڵ بەرپرسانی باڵای حکومەت سەبارەت بە پرسی ئەگەری دانوستانەکانی ئێران لەگەڵ بەڕێوبەرایەتی نوێی ئەمەریکا ڕایگەیاند "دەبێت ڕوانگەیەکی عەقڵانیتان هەبێت بۆ ڕووداوەکانی ئەمڕۆی جیهان" و وتی " دەبێ وریا بین لەوەی کە ڕووبەڕووی کێ دەبینەوە و لەگەڵ کێ مامەڵە دەکەین و لەگەڵ کێ قسە دەکەین."}

^{عەلی خامنەیی لەو کۆبوونەوەیەدا کە ڕۆژی سێشەممە، 28ی مانگی یەک بە ئامادەبوونی سەرۆکەکانی هەر سێ دەزگای جێبەجێکار و دادوەری و پارلەمانی و کۆمەڵێک بەرپرسی حکوومەتی و باڵوێزی وڵاتانی ئیسلامی بەڕێوە چوو، وتی "لە پشت بزەی دیپلۆماسییەوە، خراپە و دوژمنایەتی و کینەی ئەمەریکا هەیە " و ڕوو لە بەرپرسانی کۆماری ئیسلامی جەختی لەوە کردەوە کە "دەبێت چاومان بەرووی ئەم ڕاستیانەدا بکەینەوە و بەدوای هاوڕێیەتی نهێنیدا نەگەڕێین لەگەڵیاندا".}

^{قسەکانی ڕێبەری باڵای ئێران ڕۆژی سێشەممە دوای ئەوە دێت کە لە چەند رۆژی رابردوودا بەشێک لە بەرپرسانی کۆماری ئیسلامی ئێران لەگەڵ گەڕانەوەی دانۆلد ترامپ بۆ دەسەڵات و دەنگۆی دوبارەکردنەوەی سیاسەتی ئەو پەڕی فشار بۆ سەر ئێران، باسیان لە پێویستی ڕاستەوخۆی گفتوگۆ و گەیشتن بە ڕێککەوتن لەگەڵ ئەمەریکا کردووە.}

^{محەممەد جەواد زەریف، جێگری سەرۆکی ئێران بۆ کاروباری ستراتیژی لە کۆڕبەندی ئابووری جیهانی لە داڤۆس ڕۆژی چوارشەممە 22ی مانگی یەک ڕایگەیاند "ئێران هیوادارە سەرۆکی ئەمەریکا دانۆڵد ترامپ " ژیری " هەڵبژێرێت لە مامەڵەکردنیدا لەگەڵ کۆماری ئیسلامیدا.}

^{جێگری سەرۆکی ئێران بۆ کاروباری ستراتیژی سەبارەت بە بەڕێوبەرایەتی نوێی ئەمەریکا و سیاسەتەکەی بەرامبەر بە بەرنامە ئەتۆمییەکەی کۆماری ئیسلامی ئێران وتی "هیچ کام لەوانەی بوونە هۆی کشانەوەی ئەمەریکا لە ڕێککەوتنی ناوکی ئێران و زەلهێزان لەنێو ئیدارەی پێشووی ترامپ، لە بەڕێوبەرایەتی نوێی ئەمەریکادا ئامادە نین" و داواشی کرد کە بە گوتەی ئەو، بەڕێوبەرایەتی دووەمی ترامپ "واقیعبینانەتر" سەبارەت بە کۆماری ئیسلامی مامەڵە بکات.}

^{هەروەها ماڵپەڕی هەواڵی ئاکسیۆس چەند رۆژ پێش ئیستا بە پشت بەستن بە "دیپلۆماتە ئەوروپاییەکان" بڵاویکردەوە که ئێران پێشنیاری دانوستانی بۆ ڕێککەوتنی ئەتۆمی نوێ له گەڵ حکومەتی ئەمەریکا کردووه و نوویسبووی "نوێنەرانی ئێران لە کۆبوونەوەیەکدا لەگەڵ دانوستانکارانی ئەورووپایی، پێشنیاری دانوستانیان کردووە سەبارەت بە ڕێککەوتنێکی نوێ جیا لە ڕێککەوتنەکەی ساڵی 2015 و داوایان کردووە ئەوروپاییەکان ئەم پێشنیازە لەگەڵ بەڕێوبەرایەتی ترامپ بوروژێنن و وەڵامی واشنتن بە تاران بگەیەنن."}

^{تەنها چەند ڕۆژ دوای قسەکانی محەمەد جەواد زەریف و دەنگۆی پێشنیاری دانوستاندنەکان، هێرشی ڕەخنەگران بۆ سەر حکومەتی مەسعود پزشکیان و پێشنیاری دانوستاندن لەگەڵ بەڕێوبەرایەتی نوێی ترامپ لە ئێران دەستپێکردووە.}

^{دوو رۆژ پێش ئێستاش کۆمەڵێک نەیارانی حکومەت لە گردبوونەوەیەکدا بە ناوی "گردبوونەوەی کفن پۆشەکان" لە نزیک نووسینگەی سەرۆکایەتی ئێران لە تاران کۆبووونەوە و هێرشی توندیان کردە سەر زەریف و لایەنگرانی دانوستاندن لەگەڵ ئەمەریکا.}

^{کۆمەڵیک چاودێر پێیان وایە ئەم جۆرە دژایەتییەی دانوستاندن لە نێوخۆی ئێران تەنها بۆ شاردنەوەی ئەو ڕاستیانەیە کە گوایە پزشکیان و دەستەکەی بە فەرمانی خودی ڕێبەری ئێران هەوڵەکانیان بۆ دانوستاندن دەستپێکردووە.}

^{هاوکات ڕۆژنامەی فاینانشیاڵ تایمز لە ڕاپۆرتێکدا ڕۆژی سێشەممە، 28ی مانگی یەک نووسیویەتی ئەمساڵ لەوەتای شەڕی ئێران و عێراق قورسترین ساڵە بۆ تاران و نووسیویەتی بەرپرسانی ئێران هیوادارن بە دوورکەوتنەوە لە ڕووبەڕووبوونەوە لەگەڵ ئیدارەی ترامپ بگەنە ڕێککەوتنێکی نوێ.}

^{ڕۆژنامەکە لە زاری شرۆڤەکارانەوە بڵاویکردووەتەوە، ئێران ناتوانێت بچێتە ڕووبەڕووبوونەوە لەگەڵ دانۆڵد ترامپەوە چونکە مەترسی زیاتری ململانێی سەربازی لەگەڵ ئیسرائیل و تەنانەت ئەمەریکاش هەڕەشە لە ئێران دەکات.}

٢٩/١/٢٠٢٥