^{به‌ریتانیا ڕۆژی پێنجشه‌ممه‌ ڕایگه‌یاند یه‌كێك له‌ كه‌شتییه‌ جه‌نگییه‌كانی له‌ سه‌ره‌تای ئه‌مساڵدا له‌ كه‌نداوی فارس ده‌ستی به‌سه‌ر چه‌كی پێشكه‌وتوودا گرتووه‌ كه‌ له‌ ئێرانه‌وه‌ به‌ قاچاغ به‌ره‌و یه‌مه‌ن دەگوازرانەوە، ئه‌مه‌ش به ‌پێچه‌وانه‌ی بڕیارێكی ئه‌نجومه‌نی ئاسایشی نه‌ته‌وه‌ یه‌كگرتووه‌كانه‌.}

^{وەزارەتی بەرگری بەریتانیا ڕایگەیاند، کەشتییەکەی بە ناوی HMS Montrose لە مانگەکانی یەک و دوودا کەشتیەکی خێرای بچووکی ڕاگرتووە کە هەڵگری موشەکی زەوی بۆ ئاسمان و بزوێنەری جۆرێکی موشەکی کرۆز بوون کە بۆ هێرشی سەر زەمینی بەکاردێت.}

^{ئاماژەی بەوەشکردووە، ئەو بەلەمە خێرایانە لەلایەن قاچاخچییەکانەوە لە ئاوە نێودەوڵەتییەکانی باشووری ئێران بەڕێوەدەبرێن، ئەمەش یەکەم جارە کە کەشتییەکی جەنگی بەریتانیا ڕێگری لەو کەشتیانە بکات کە چەکی ئاڵۆزی لەو جۆرەیان لە وڵاتێکەوە هەڵگرتووە.}

^{بەپێی زانیارییەکانی وەزارەتی بەرگری بەریتانیا، ئەو بارە نایاساییە لەلایەن هەلی کۆپتەرێکی جۆری وایڵدکاتەوە بینراوە کە سیستەمی ڕاداری پێشکەوتووی تێدایە و لەسەر کەشتییە جەنگییەکەوە هەستاوە.}

^{وەزارەتەکە ڕایگەیاندووە، ئۆپەراسیۆنی دووەم لە 25ی مانگی دوودا ڕوویداوە و کەشتییەکی تێکشکێنەری هێزی دەریایی ئەمەریکای بە ناوی USS Gridley بەشداربووە، کە هەلی کۆپتەرێکی جۆری سیهۆکی ناردووە "بۆ دابینکردنی چاودێرییەکی گرنگ."}

^{ئاماژەی بەوەشکردووە، دەستبەسەرداگرتنەکان لەلایەن هێزەکانی مارینزی شاهانەی بەریتانیاوە سەرپەرشتیکراون، کە بە دوو بەلەمی بچووک لە بەلەمە خێراکان نزیکبوونەتەوە و دەستیان بەسەردا گرتووە و پشکنینیان بۆ کردووە.}

^{دەیان پاکێج چەکی پێشکەوتوویان لەسەر ئەو بەلەمانە دۆزیوەتەوە و دەستیان بەسەرداگرتوون و گواستوویانەتەوە بۆ کەشتییە سەربازییە زەبەلاحە بەریتانییەکە.}

^{سەرچاوە: فرانس پرێس}

8/7/2022