^{وەزیری دەرەوەی ئێران ڕۆژی شەممە پێشوازیکرد لە لێدوانەکانی ئەمدواییەی شازادەی جێنشینی عەرەبستانی سعودیە لەسەر پەیوەندییەکانی نێوان ئەو دوو نەیارە هەرێمییە، وەکو "خواستێکی" چاککردنەوی پەیوەندییەکانیان.}

^{حسێن ئەمیرعەبدوڵاهیان بە ئاژانسی دەنگوباسی فەرمی ئێرانی ڕاگەیاند " لێدوانەکانی ئەمدواییەی کاربەدەستێکی باڵای سعودیە خواستیان نیشان دەدات بۆ دامەزراندنی پەیوەندی دوولایەنە لەگەڵ ئێراندا، و ئێمە پێشوازی لەوە دەکەین."}

^{شازادە محەمەد بن سەلمان لە وتووێژێکدا لەگەڵ ڕۆژنامەیThe Atlantic کە ڕۆژی پێنجشەممە بڵاوکرایەوە، گوتووە " وڵاتەکەی و ئێران "دراوسێی هەمیشەیین".}

^{بە پێی ئەو بەشەی وتووێژەکە کە لەلایەن دەزگای هەواڵی فەرمی سعودیەوە بڵاوکراوەتەوە ئەو دەڵێت " ئێمە ناتوانین لێیان ڕزگاربین و ئەوانیش ناتوانن لێمان ڕزگاربن." دەشڵێت " جا باشترە بۆ هەردوولامان بەدوای ئەو ڕێگایانەدا بگەڕێین کە تیایدا بتوانین پێکەوە بژین. " و هیواشی دەربڕی و گوتی " دەتوانین بگەین بە هەڵوێستێک کە بۆ هەردوو وڵات باشتربێت."}

^{لە ساڵی 2016دا خۆپیشاندەران هێرشیان کردە سەر ئەرکە دیپلۆماسییەکانی سعودیە لە ئێران پاش ئەوەی سعودیە کەسایەتیەکی ئاینی شیعەی لەسێدارە دا، ڕیاز لەو کاتەدا بە بڕینی پەیوەندییەکانی لەگەڵ تاران وەڵامی دایەوە.}

^{ئەو دوو ڕکابەرە لە مانگی چواری ساڵی ڕابردووەوە چوار خولی گفتوگۆکانیان لە عێراق ئەنجام داوە و ئامانجیان باشترکردنی پەیوەندییەکانە.}

^{گەورە دیپلۆماتی ئێران گوتی " ئەم وتووێژانە کەشێکی باشی ڕەخساندووە و ئەنجامی هەبووە، هەرچەندە ئەنجامەکان کەم بوون، بەڵام خۆشحاڵین بەوەی سعودیە ڕێگای دیالۆگی هەڵبژاردووە."}

7/3/2022