^{فەرماندەی سەرکردایەتی ناوەندی ئەمەریکا جەنەڕاڵ کینیث مککێنزی کە سەرپەرشتی دوایین گواستنەوەی هاوڵاتیان و کشانەوەی هێزەکانی ئەمەریکای کرد لە ئەفغانستان دەڵێت تاڵیبان " یارمەتیدەر " بووە لە کارئاسانیکردن لە گواستنەوەی ئەفغانیەکان و ئەمەریکیەکان و ئەوانی دیکەدا.}

^{وتیشی سوپای ئەمەریکا زۆرینەی بیست ساڵی ڕابردووی تەرخانکرد بۆ شەڕکردن لەگەڵ تاڵیباندا، بەڵام ئێستا خۆمان ڕێکدەخەین لەگەڵ ئەو ڕاستیەدا کە چەکدارانی تاڵیبان کۆنتڕۆڵی وڵاتەکەیان کردووە.}

^{جەنەڕاڵ مککێنزی لە وەزارەتی بەرگری ئەمەریکا لە کۆنفرانسێکی ڕۆژنامەوانیدا وتی پێی وایە تاڵیبان لە ڕۆژانی داهاتوودا ڕووبەڕووی قورسایی دەبێتەوە لە پاراستنی کابوڵدا، ئەوەش بەهۆی هەڕەشەکانی ڕێکخراوی داعشی خۆراسانەوە.}

^{مککێنزی وتی چەکدارانی تاڵیبان لەم ڕۆژانەی دواییدا چەکدارانی داعشیان لە زیندانەکان ئازاد کردووە، نزیکەی 2000 چەکدار، وتی " ئێستا ( تاڵیبان ) دەتوانن چییان چاندووە ئەوە بدوورنەوە."}

^{سەرچاوە/ بەشی کوردی دەنگی ئامریکا}

٣١/٨/٢٠٢١