ئەمڕۆ سێشەممە عەلی خامنەیی، رێبەری ئێران بڕیاری بە سەرۆککۆماربوونی دایە ئیبراهیم رەئیسی و ئەو وەک سەرۆککۆماری خولی سێزدەیەم دانا.
رێوڕەسمی پێدانی بڕیاری سەرۆککۆماری بە ئیبراهیم رەئیسی لە مەزارگەی روحووڵڵا خومەینی، دامەزرێنەری کۆماری ئیسلامی و بە ئامادەبوونی کۆمەڵێک لە بەرپرسانی ئێران بەڕێوەدەچێت.
ئیبراهیم رەئیسی دوای ئەوەی بڕیاری سەرۆککۆماری لە رێبەری ئێران وەردەگرێت، رۆژی پێنجشەممە لە پەرلەمانی ئەو وڵاتە سوێندی یاسایی دەخوات و وەک هەشتەمین سەرۆککۆماری ئێران بە فەرمی دەستبەکار دەبێت.
دوای هەڵبژاردنی سەرۆککۆماریی، تاوەکو کاتێک کە رێبەری ئێران بڕیاری دەستبەکاربوون بۆ سەرۆککۆمار دەرنەکات، دەنگی خەڵک رەوایەتی نابێت.
بەپێی دەستووری ئێران، دوای ئەوەی کە لە هەڵبژاردندا بەربژێرێک زیاترین دەنگەکانی هێنایەوە، ئەنجوومەنی پاراستنی دەستوور دەبێت ئەنجامی هەڵبژاردن پەسند بکات و دوای ئەویش دەبێت رێبەری ئێران بڕیاری سەرۆککۆماربوون بۆ بەربژێر براوەکە دەربکات.
بەپێی ئەو بڕیارە رێبەر تاوەکو کاتی کۆتاییهاتنی ماوەی سەرۆککۆماریی، چاودێریی بەسەر سەرۆککۆمارەوە دەکات و ئەگەر سەرۆککۆمار لە چوارچێوە دیاریکراوەکان لابدات، رێبەر دەتوانێت رەوایەتی لە سەرۆککۆمار وەربگرێتەوە.
سەرۆککۆمار دوای رێبەری ئێران بەرزترین بەرپرسی وڵاتە و بەپێی یاسا بەرزترین بەرپرسی جێبەجێکاری ئەو وڵاتەیە.
هاوکات لەگەڵ رێوڕەسمەکانی بڕیاری دەستبەکاربوون و سوێندخواردنی ئیبراهیم رەئیسیدا رێوشوێنە ئەمنییەکان لە تاران تووندوتۆڵ کراون، هاتووچۆ لە هەندێ لە شەقامەکان تاران قەدەخە دەبێت و ئەو گەشتە ئاسمانییانە رادەگیرێن کە بە ئاسمانی تاراندا تێپەڕ دەبن.
لە رێوڕەسمی پێدانی بڕیاری دەستبەکاربوونی سەرۆککۆماری نوێدا، سەرۆککۆماری پێشوو، سەرۆکی پەرلەمان، سەرۆکی دەزگای داد و سەرۆکی کۆڕی دەستنیشانکردنی بەرژەوەندییەکانی کۆماری ئیسلامی بەشدار دەبن.
3/8/2021
