^{شەڕ و پێکدادانەکان لە ئەفغانستان بەردەوامن و بەرپرسانی ئەفغانی دەڵێن هێزەکانی ئاسایشی وڵاتەکە بەرپەرچی هەندێک لە پێشڕەوییەکانی تاڵیبانیان داوەتەوە.}

^{لە دوای دەستپێکردنی کشانەوەی هێزەکانی ئەمەریکا و هاوپەیمانان لە ئەفغانستان لە 1 ی مانگی پێنجدا، چەکدارانی تاڵیبان ناوچەکانی ژێر دەسەڵاتیان فراوانترکردووە، زیاتر لە 60 ناوچەیان کۆنتڕۆڵکردووە و زیانێکی گیانی گەورەشیان لە هێزەکانی ئاسایشی ئەفغانستان داوە.}

^{نوێنەری تایبەت و بەڕێوبەری ئەرکی یارمەتییەکان لە ئەفغانستان ( یوناما ) دێبرا لایەنس وتی " زۆربەی ئەو ناوچانەی کۆنتڕۆڵکراونەتەوە لە دەوروبەری پایتەختی هەرێمەکانن، ئەمەش ئاماژەیەکە لەسەر ئەوەی تاڵیبان دەیەوێت دوای کشانەوەی تەواوەتی هێزە بیانییەکان سەرجەم ئەو پایتەختانە کۆنتڕۆڵ بکاتەوە."}

^{لایەنس لەمیانەی کۆبوونەوەیەکی ئەنجومەنی ئاسایشی نێودەوڵەتیدا لە نیویۆرک وتی " دەبێت ڕاستییەکە قبوڵ بکەین، زیادبوونی ململانێکان لە ئەفغانستان مانای زیادبوونی ناسەقامگیرییە لە وڵاتانی دیکەش، بە وڵاتانی دوور و نزیکیشەوە."}

^{کۆنتڕۆڵکردنی ناوچەی زیاتر لەلایەن تاڵیبانەوە ترس و نیگەرانییەکانی زیادکردووە سەبارەت بەوەی تاڵیبان دووبارە فەرمانڕەوایی وڵاتەکە بکاتەوە، لەکاتێکدا ئەمەریکا و هاوپەیمانان وابڕیارە تاوەکو 11 ی مانگی نۆ سەرجەم هێزەکانیان لە ئەفغانستان بکشێننەوە.}

^{ڕۆژی دووشەممە ئەمەریکا جەختی لەوە کردەوە کشانەوەی هێزەکانی ئەمەریکا بەردەوامە و لەسەر فەرمانەکانی سەرۆکی ئەمەریکا جۆو بایدن بەڕێوەدەچێت.}

^{وتەبێژی وەزارەتی بەرگری ئەمەریکا جۆن کیربی بە ڕۆژنامەنووسانی وت " ئێمە کشاندنەوەی سەرجەم هێزەکانی ئەمەریکا لە ئەفغانستان تەواو دەکەین جگە لەوانەی کە بۆ پاراستنی ئەرکە دیبلۆماتییەکان دەمێننەوە، هەروەها پێش مانگی نۆش تەواو دەبێت."}

^{وتیشی " ئەو دوو شتە جێگیرن و ناگۆڕدرێن."}

^{هەفتەی ڕابردوو سوپای ئەمەریکا ڕایگەیاند زیاتر لە نیوەی هێزەکان کشاونەتەوە.}

^{کیربی وتی، سەرکردە سەربازییەکانی ئەمەریکا بە وردی چاودێری و تاوتوێی ڕەوشی ئەفغانستان دەکەن لە حاڵەتێکدا ئەگەر پێویست بێت " گۆڕانکاری لە خێرایی یاخود ماوە و فراوانی کشانەوەکەدا بکرێت."}

^{وتیشی " ئێمە تاوتوێی کۆمەڵێک بژاردە دەکەین، من ناتوانم لە ئێستادا یەکێک لەو بژاردانە پشتڕاست بکەمەوە، بەڵام، دووبارە دەیڵێمەوە پشتیوانی ئێمە بۆ هێزەکانی ئەفغانستان دوای کشانەوەکە، بەتەواوەتی لەڕووی داراییەوە دەبێت."}

^{بەرپرسانی ئەفغانستان وتیان لەمیانەی شەڕ و پێکدادانەکاندا هێزەکانی ئەفغانستان چەکدارانی تاڵیبانیان لە کۆمەڵێک ناوچە لە باکوور و باکووری ڕۆژهەڵاتی هەرێمەکانی باڵخ و باخلان و کوندوز دەرکردووە.}

^{وتەبێژی تاڵیبان زەبیحوڵا موجاهید لێدوانی ئەو بەرپرسانەی ڕەت کردەوە و لە تویتەر نوسیویەتی چەکدارەکانی تاڵیبان کۆنتڕۆڵی سەرجەم ئەو ناوچانەیان کردۆتەوە کە پێشتر دەستیان بەسەرداگیرابوو.}

^{دانیشتوانی هەرێمی کوندوز ڕۆژی سێشەممە بە دەنگی ئەمەریکایان وت تاڵیبان دەستی گرتووە بەسەر بەندەری شێر خاندا کە دەکەوێتە سەر سنووری نێوان ئەفغانستان و تاجیکستان و بە شوێنێکی سەرەکی ڕێڕەوی بازرگانی دادەنرێت.}

^{وتەبێژی هێزەکانی ئاسایشی ئەفغانستان ئەجمال عومەر شینواری لە کۆنفرانسێکی ڕۆژنامەوانیدا لە کابوڵ وتی حکومەتی ئەفغانستان سوور بووە لەسەر کۆنتڕۆڵکردنەوەی سەرجەم ئەو ناوچانەی تاڵیبان دەستی گرتووە بەسەریاندا.}

^{جێی ئاماژەیە زیاتر لە نیوەی 407 ناوچەکەی 34 هەرێمەکەی ئەفغانستان کۆنتڕۆڵکراون یاخود لەلایەن تاڵیبانەوە لەژێر هەڕەشەدان.}

^{سەرچاوە/ دەنگی ئەمەریکا}

23/6/2021