^{شەش ڕیکخراوی مەدەنیی مەریوان بەنیسبەت توندوتیژییەکانی ئەم دواییانە لە مەریوان لەلایەن کەسانێکی توندڕەوەوە، بەیانییەیەکیان بڵاو کردوەوە و بە لەبەرچاو گرتنی دۆخی هەستیاری ناوچەکە داوایان لە هەموو چین و توێژەکان، چالاکانی کۆمەڵایەتی و مەدەنی، مامۆستایانی ئایینی و کەسانی خاوەن پێگە و مەرجەع کردووە کە بێدەنگ نەبن و ئەرکی ئەخلاقی و مێژوویی خۆیان لە ڕاستای یەکڕیزی و تەبایی و ئاشتیی کۆمەڵایەتیی شاری مەریوان جێبەجێ بکەن.}

^{دەقی بەیانییەکە بەم چەشنەیە:}

^{بە ناوی خوا}

 ^{ڕوونکردنەوەی ڕێکخراوە مەدەنییەکانی مەریوان لەسەر توندوتیژییەکانی ئەم دواییه‌ی شارەکەمان.}

^{خەڵکی بەڕێز و بە ئەمەگی  مەریوان، هەروەها کە ئاگادارن، لە ڕۆژانی ڕابردوودا چەن کردەیەکی توندوتیژ لە شارەکەماندا ڕووی دا کە بوو بە هۆی شڵەژان و بریندارکردنی هەستی خەڵک و نیگەرانیی ڕای گشتی.}

^{ئەم کردەوە ناشیرینانە کە بوو بە هۆکاری دڵەڕاوکێ و تێکچوونی ئاشتیی کۆمەڵایەتی، لەنیۆ کومەڵگا و بنەماڵەکان، لە ناوەڕۆکی خۆیدا هەڵگری پەیامێکی خراپ و ئاماژەیەکی مەترسیدارە بۆ ژیانی ئاشتیانە و تەبایی و پێکەوە بوونمان.}

^{هاووڵاتیانی بەڕێز، شاری مەریوان خاوەن مێژوویەکی پڕ لە شانازیی پێکەوەبوون و ژیانی مەدەنی و ئاشتی و فرە چەشنی بووە، ئەم دەڤەرە بەهۆی جووڵەی فکری و فەرهەنگی و کۆمەڵایەتی، هەمیشە شارێکی زیندوو و ئەکتیڤ بووە، مووزائیکی فکر و کەلتوور و ڕێکخراوی جیاواز بووە،بە درێژایی مێژوو، ئەم شارە ئامێزی کراوە بووە بۆ ڕەنگ و دەنگی جیاواز و هیچکات ئەم جیاوازیانە نەبوەتە هۆی کێشە‌ی کۆمەڵایەتی، ململانێ و لێکترازان.}

^{بە پێچەوانەوە لەسەر بنەمای پرنسیپی پێکەوەژیانی دێموکراتیک و یەکتر قبووڵکردن و ڕێزدانان بۆ ڕای یەکتر، ژیانیان بە ڕێ کردووە.}

^{ئێمە لەو بڕوایەداین، لەسەردەمی ئەمڕۆ و بەم ئاستە لە پێشکەوتن کە مرۆڤ بە دەستی خستووە، ئێتر کەلتووری سڕینەوە و هێرشی توندوتیژانە بۆ سەر باوڕی ئینسان، هیچ جێگە و پێگەیەکی نییە و لەلایەن ڕای گشتیی جەماوەر، مایەی پەسەندکردن نییە. ترس و تۆقاندن و هەڕەشە و کوشت و بڕ هیچ جێگایەکی نە لە ئێستە و نە لە مێژووی ئێمەدا نەبووە و نایبێت.}

^{پێویستە لەسەر بنەمای ئەو میراتە مەدەنییە کە لەسەر ڕەنج و زەحمەتی هەزاران کەس، لە زیاتر لە نیو سەدە لەم شارەدا، بۆمان بەجێ ماوە، فۆرمی ژیان و شێوازی پێوەندییەکانمان ڕێک بخەین.}

^{پێویستە ئەم میراتە کە ڕەنگدانەوەی ڕای ئازاد و حورمەتدانان بۆ یەکتر و ئاشتیی کۆمەڵایەتی، پەرە پێ بدەین و گەشە بکات.}

^{ئێمە پێمان وایە ئایین پارچەیەکی دانەبڕاوی ژیانی کۆمەڵایەتی و پێویستییەکی مۆراڵی و مەعنەویی کۆمەڵگایە. هیچکات لە مێژووی دوور و نزیکی ئێمەدا ئەرکی ئایین ترس و تۆقاندن نەبووە، بۆیە هەرچەشنە بەکارهێنانی ئایین وەک ئامراز و کەرەستە، بۆ بەرژەوەندیی کەس و چین و تاقم و گرووپێک و تەنانەت دەسەڵاتیش،، ڕەت ئەکەینەوە.}

^{گەلی ئێمە خاوەن بیر و باوڕی خۆیەتی، ئایین بە جۆرێک لەگەڵ ژیانی نەتەوەیی و داب و نەریتی ئێمە خۆی گونجاندووە و بووە بە بەشێکی دانەبڕاو لە ژیانی کۆمەڵایەتی و شایەنی ڕێزگرتنە. بەڵام بە کار هێنانی دینیش لە ژێر هەندێ ناوی شاراوە و نهێنیدا، بۆ بەدەست خستنی هەژموونی کومەڵایەتی و سیاسی و هتد جێگای پەسەند نییە.}

^{لەم چوارچێوەدا ئێمە بە کارهێنانی تووندوتیژی(خشونت) له هەر فۆرم و بە هەر شێوازێک شەرمەزار و ئیدانە ئەکەین.}

^{جێگای خۆیەتی هەر لێرەوە لە بەرپرسانی خۆجێی و لۆکاڵی ئەم شارە ڕەخنە بگرین، کە هەرگیز لەم بوارانەدا ڕۆڵێکی ئەرێنی و ئیجابیان نەگێڕاوە و خۆیان بە بەرپرسیار نەزانیوە و نەیانتوانیوە باوڕ و متمانەی خەڵک بە دەست بهێنن.}

^{لەم سۆنگەوە ئێمە وەک ڕێکخراوە مەدەنییەکانی مەریوان، بە هەستکردن بە بەرپرساریەتی مێژوویی و بە لەبەرچاوگرتنی دۆخی هەستیاری ناوچەکەمان، داوا لە هەموو چین و توێژەکان،چالاکانی کۆمەڵایەتی و مەدەنی، مامۆستایانی ئایینی و کەسانی خاوەن پێگە و مەرجەع ئەکەین کە بێدەنگ نەبن و ئەرکی ئەخلاقی و مێژوویی خۆێان جێبەجێ بکەن و ڕۆڵیان هەبێ لە یەکڕیزی و تەبایی و ئاشتیی کۆمەڵایەتی شارەکەمان و ئەرکی مێژوویی خۆیان جێبەجێ بکەن.}

^{۱٦ی گۆڵانی ۱٤۰۰، شۆرای ڕێکخراوە مەدەنییەکانی مەریوان.}

^{ئەنجومەنی فەرهەنگی ئەدەبیی مەریوان
ناوەندی فەرهەنگی، هۆنەریی ڤەژین
ناوەندی زانستی، فەرهەنگیی ڕۆنان
ئەنجومەنی سەوزی چیای مەریوان
ئەنجومەنی ژیانەوەی مەریوان بۆ بەرەنگاربوونەوەی ماددەی هۆشبەر
ئەنجومەنی فەرهەنگی ئەدەبیی ڕۆجیار}