^{لە ماوەی ڕۆژانی ڕابردوودا، "فایەق یووسفی" ئەندامی گرووپی شاخەوانیی «هەڵۆ»ی سەقز و "جەلال ڕۆستەمی" لە چالاکوانی مەدەنیی شاری کامیاران، بۆ جێبەجێ کردنی حوکمەکەیان ڕەوانەی زیندانی شارەکانی سەقز و کامیاران کران.}

^{ئاسۆی ڕۆژهەڵات/ ڕۆژی شەممە ١٠ی خەزەڵوەری ١٣٩٩ی هەتاوی، فایەق یووسفی بۆ جێبەجێکردنی حوکمی ٦ مانگ زیندان خۆی ڕادەستی زیندانی سەقز کرد.
ناوبراو ڕۆژی ١٨ی پووشپەڕی ١٣٩٨ی هەتاوی لە لایەن هێزە ئەمنییەکانەوە دەستبەسەر کرا و دوای دوو مانگ بە دانانی بارمتە لە زیندان ئازاد کرا. ئەم شارۆمەندە کوردە ٢٥ی خەزەڵوەری ساڵی ڕابردوو بە تۆمەتی "پڕۆپاگەندا دژ بە نیزام" لە لایەن دادگای شۆڕشی ئیسلامیی سەقزەوە حوکمی ١٠ مانگ زیندانی بە سەردا سەپا ئەم حوکمە لە دادگای پیاچوونەوەدا کەم کرایەوە بۆ ٦ مانگ.
هەروەها لەم ڕۆژانەی ڕابردوودا جەلال ڕوستەمی، لە چالاکوانی مەدەنیی کورد کە حوکمی ٥ ساڵ زیندانی لە دادگای پیاچوونەوەی سنەدا گۆڕاوە بۆ ٢ ساڵ و نیو، بۆ جێبەجێکردنی حوکمەکەی ڕەوانەی زیندانی کامیاران کراوە.
جەلال ڕوستەمی لە ٢٣ی ڕەشەمەی ١٣٩٧دا لە لایەن هێزە ئەمنییەکانەوە لە شاری ڕامسەری ئۆستانی مازەندەران دەستبەسەر کرابوو، دوای کۆتاییهاتنی لێپرسینەوەکان، ڕۆژی ٢٣ی گوڵانی ١٣٩٨ی هەتاوی گواسترایەوە بۆ زیندانی ناوەندیی سنە و ٢٩ی گوڵان بە دانانی بارمتەی ٥٠٠ میلیۆن تمەنی ئازاد کرا.
ناوبراو سەرماوەزی ساڵی ڕابردوو لە لایەن لقی یەکەمی دادگای شۆڕشی ئیسلامیی سنەوە بە سەرۆکایەتیی دادوەر «سەعیدی» بە تۆمەتی "ئەندامییەت لە یەکێک لە حیزبە کوردییەکانی دژبەری کۆماری ئیسلامی" حوکمی ٥ ساڵ و بە تۆمەتی "پڕۆپاگەندا دژ بە نیزام" حوکمی ١ ساڵ زیندانی بە سەرداسەپا.}

4/11/2020