(2).jpeg)
چەند وڵاتێکی جیهان بەهۆی گومانەکانیان لەسەر بڵاوکردنەوەی ڤایرۆسی کۆڕۆنا خەریکی لێکۆڵینەوەن.
هاوکات لە گەڵ ئەوەی کە وڵاتانی ئیتالیا، ئیسپانیا و ئەمریکا ڕایانگەیاند کە لە چۆنیەتی پێکهاتنی پەتای کۆرۆنا دەکۆڵنەوە و گومانیان لەسەر وڵاتی چینە کە بە مەبەست و بە هۆکاری سیاسی و ئابووری ئەو ڤایرۆسەی سازکردبێ، جێگری وەزیری تەندروستی کۆماری ئیسلامیش “کیانووش جەهانپوور” ناڕاستەوخۆ ئەو گومانەی دەربڕی و چینییەکانی بە درۆکردن لە گەڵ وەزارەتی تەندروستی کۆماری ئیسلامی تۆمەتبار کرد.
جێگری وەزیری تەندروستی کۆماری ئیسلامیی ئێران ڕایگەیاند کە ئامار و زانیارییەکانی وڵاتی چین هیچیان ڕاست نین و تەنانەت ئەو بەستە تەندروستیانەش کە بۆ ئێمەی ڕەوانە کردوون و لەوانە ئەو کەرەستانەی تێستی کۆرۆنا، هەروەها زانیاری سەبارەت بەو ڤایرۆسە هەمووی درۆن و ئەمە گاڵتەیەکی مەترسیدارە.
شایانی باسە کە دۆناڵد ترامپیش چەند جار بە جێگای کۆرۆنا گوتوویە ڤایرۆسی چینی و هەروەها باس لەسەر ئەوە دەکرێ کە دەزگای هەواڵگریی وڵاتان خەریکی لێکۆڵینەوەی وردن لەسەر ئەو بابەتە، بەڵام هەرچی بەرەو پێشتر دەچن گومانەکان لەسەر چین زیادتر دەبێ.
هەر لەو پێوەندییەدا چەند ڕۆژ پێش بەرپرسێکی چینی ڕایگەیاند کە ٤ میلیارد ماسکیان لەماوەی یەک مانگدا بە وڵاتانی دیکەی جیهان فرۆشتوە.
6/4/2020
