پزیشكێك كه هه‌ڵگری بروانامه‌ی دكتۆرایه له سیسته‌می به‌رگریی له‌ش، ئاماژه به‌وه ده‌كات كه سیسته‌می به‌رگریی له‌ش ده‌توانێت به‌ره‌نگاری ڤایرۆسی كۆرۆنا ببێته‌وه و جه‌ختیش له‌وه ده‌كاته‌وه كه ئه‌و حاڵه‌ته‌ی له ئه‌ورووپا روویداوه لێره روونادات به‌هۆی بۆماوه‌یی خه‌ڵكی ناوچه‌كه و رێكخستنی سیسته‌می خه‌و و خواردنی ڤیتامینه‌كانیش به به‌شێك له به‌ره‌نگاربوونه‌وه‌ی ئه‌م ڤایرۆسه ده‌زانێت و پێشبینی ده‌كات له كۆتایی مانگی چوار به‌هۆی گه‌رمبوونی كه‌شوهه‌وا ئه‌م ڤایرۆسه كۆتایی بێت.
له‌باره‌ی جۆر و شێواز و پێكهاته‌ی ڤایرۆسی كۆرۆنا، دكتۆر فكری عه‌لی هه‌ڵگری بڕوانامه‌ی دكتۆرا له سیسته‌می به‌رگریی له‌ش، به ئانادۆڵی وتووه: "ئه‌م ڤایرۆسه وه‌ك هه‌ر ڤایرۆسێكی دیكه پێكهاته‌یه‌كی زۆر بچووكه، بچووكییه‌كه‌ی ده‌گاته 100 تا 120 نانۆمیتر، پێكهاتووه له به‌رگێكی چه‌وری له‌گه‌ڵ مادده‌یه‌كی بۆماوه‌یی و پڕۆتین، كاتێك ئه‌م ڤایرۆسه ده‌چێته ناو خانه‌كانی له‌شی مرۆڤ و له‌كاتی ده‌رچوونی له خانه‌كه، په‌رده‌یه‌كی چه‌وری له‌گه‌ڵ خۆی وه‌رده‌گرێت، یه‌كێك له‌و خاڵانه‌ی كه وایكرد ئه‌م ڤایرۆسه لاواز بێت ئه‌وه‌یه، چونكه ئه‌م په‌رده‌یه هه‌روه‌كو چۆن رێنماییه ته‌ندروستییه‌كانیش ئامۆژگارییان وایه كه ده‌سته‌كانمان به كحول و سابون و ئاوی گه‌رم بشۆین، به گه‌رمی و سابون و كحول تێكده‌شكێت و كه په‌رده‌كه تێكشكا، ئه‌وا خودی ڤایرۆسه‌كه‌ش توانای دروستكردنی نه‌خۆشی نامینێت".
له‌باره‌ی رێگاكانی گواستنه‌وه‌ی ڤایرۆسه‌كه، دكتۆر فكری عه‌لی وتی: "ئه‌م ڤایرۆسه وه‌كو ئه‌نفلۆنزا له‌یه‌كترده‌چن، له رێگای پژمین، كۆكه، به‌ریه‌ككه‌وتن و ده‌ستدان له ده‌م و چاو، چونكه چوونه ژووره‌وه‌ی ڤایرۆسه‌كه له رێگای چاو و ده‌م و لووته‌وه ده‌بێت و ده‌گوازرێته‌وه، هه‌رچه‌نده ئه‌م دوو بابه‌ته‌ی كۆكه و پژمین بۆخۆیان دوو كاریگه‌ری مرۆڤن بۆ به‌رگرییكردن له نه‌خۆشی، به واتایه‌كی دیكه كاتێك مرۆڤ ده‌پژمێت ئه‌مه كاردانه‌وه‌یه‌كه بۆ ئه‌وه‌ی خۆی له نه‌خۆشییه‌كه بپارێزێت".
27/3/2020
