^{بانگهێشت و دەسبەسەرکردنی هاووڵاتییان بە تۆمەتی بەشداری لە کۆبوونەوەی ناڕەزایەتیی مەحکوومکردنی هێرشی تورکیە بۆ سەر ڕۆژئاوا، بەردەوامە.}

 ^{ڕۆژی یەکشەممە، ٢١ی ڕەزبەر، "سەید عەلی حوسێنی"، چالاکی کرێکاریی خەڵکی شاری سەقز، بانگهێشتی ڕێکخراوی ئیتلاعاتی سپای پاسداران کراوە و لە پەیوەندیی لەگەڵ بەشداریکردنی لە کۆبوونەوەی ناڕەزایەتی لە هەمبەر مەحکوومکردنی هێرشی دەوڵەتی تورکیە بۆ سەر ڕۆژئاوا، لێکۆڵینەوەی لەگەڵ کراوە.}

^{هاوکات لە هەمان ڕۆژدا، "مەحموود ساڵحی" و "عوسمان ئیسماعیلی"، لە چالاکانی کرێکاریی شاری سەقز، لە پەیوندییەکی تەلەفۆنیدا، بانگهێشتی ئیدارەی ئەماکنی ئەو شارە کران و لە پەیوەندی لەگەڵ بەشداری لە کۆبوونەوەی ناڕەزایەتی دژی تورکیە، لێپرسینەوەیان لەگەڵ کرا.}

^{لە لایەکی دیکەوە، لە دوو ڕۆژی ڕابردوودا، دوو لاوی کورد بە ناوەکانی "فواد عینایەتی و موبین خوسرەوی"، خەڵکی شاری سنە بە تۆمەتی "بەشداری لە کۆبوونەوەی ناڕەزایەتی بۆه پشتیوانی ڕۆژئاوا"، لە لایەن هێزە ئیتلاعاتییەکانەوە دەسبەسەر و بۆ شوێنێکی نادیار ڕاگوێزران.}

^{هەروەها ڕۆژی دووشەممە، ٢٢ی ڕەزبەر، سێ هاووڵاتیی کورد بە ناوەکانی "هێمن عەبدوڵڵاهی، سەمعی وەیسی و عەبدوڵڵا سلێمانی"، خەڵکی "نەڵاسـ"ـی شاری سەردەشت، لە کۆبوونەوەی ناڕەزایەتیدا دەسبەسەر و لە چارەنووسی ئەوان هیچ زانیارییەک لەبەر دەستدا نییە.}

^{لەو پەیوەندییەشدا، لە شاری پاوە، ژمارەیەک لە هاووڵاتییانی کورد بە تۆمەتی "بەشداری لە کۆبوونەوەی ناڕەزایەتی بۆ پشتیوانی لە ڕۆژئاوا" دەسبەسەر کران کە شوناسی ٧ کەس لەو هاووڵاتییە دەسبەسەر کراوەکانە بۆ ئاژانسی کوردپا ڕوون بووەتەوە و بەم شێوەیەیە: "لوقمان کیانی، هونەر حوسێنی، ئاشنا حەسەنزادە، کەیهان عەزیزی، کۆسار محەممەدی، باست محەممەدی و ئیحسان ئاقایی".}

سەرچاوە :کوردپا

١٦/١٠/٢٠١٩