^{ماڵپەڕە نزیکەکان لە ناوەندە ئەمنییەتییەکان، ئەندامێکی دەسبەسەرکراوی ئەنجومەنی فەرهەنگی- کۆمەڵایەتیی "نۆژین"، بە ئەندامبوون لە "یەکێک لە حیزبە کوردییەکانی دژبەری حکوومەتی ئێران" تاوانبار کرد.}

^{ماڵپەڕەکانی نزیک لە ناوەندە ئەمنییەتییەکانی حکوومەتی ئێران، تۆمەتی "ئەندامییەتیی یەکێک لە حیزبە کوردییەکانی دژبەری حکوومەتی ئێران"ی دایە پاڵ "زارا محەممەدی"، ئەندامی دەسبەسەرکراوی ئەنجومەنی فەرهەنگی- کۆمەڵایەتیی "نۆژین".}

^{بە وتەی سەرچاوەیەکی ئاگادار، ئیدعاکانی ئەو ماڵپەڕە لە کاتێکدایە کە "زارا محەممەدی" لە شاری سنە، خەریکی وتنەوەی وانەی زمان و وێژەی کوردی بووە.}

^{ڕۆژی چوارشەممە، ٢٧ی خەرمانان، "زارا محەممەدی"، ئەندامی دەسبەسەرکراوی ئەنجومەنی فەرهەنگی- کۆمەڵایەتیی "نۆژین"، بەبێ ئامادەبوونی پارێزەرەکەی بە ناوی "مێهرداد عەلیخانی"، براوەتە دادگای ئینقلابی شاری سنە.}

^{ئەنجومەنی فەرهەنگی- کۆمەڵایەتیی "نۆژین" بە پشتڕاستکردنەوەی ئەم هەواڵە ڕایگەیاند: "زارا لە کاتێکدا بۆ دانپێدانانی زۆرەملێ لەژێر گوشاردایە کە سەر بە هیچ حیزب و لایەنێکی سیاسی نییە و تەنیا تاوانی، ڕاهێنانی منداڵان بە زمانی کوردی بووە."}

^{"کانی محەممەدی"، خوشکی زارا محەممەدی"، لە لاپەڕەی توییتریی خۆیدا نووسیبووی: "ڕۆژی ٢٧ی خەرمانان، پاش ٤ مانگ دەسبەسەریی نایاسایی و نامرۆڤانە و بەبێ ڕاگەیاندنی تاوانەکانی، زارا برایە دادگا و بەبێ ئاگادارکردنەوەی بنەماڵە و پارێزەرەکانی، دەیانهەویست بڕیاری بە سەردا بسەپێن".}

^{ماوەیەک پێشتر، برایەکی "زارا محەممەدی" لە وتووژێکدا لەگەڵ ئاژانسی کوردپا، ڕایگەیاند کە لە چارەنووس و تۆمەتی وەپاڵدراوی "زارا"، هیچ زانیارییەکی وردیان نییە.}

^{"زارا محەممەدی"، ڕۆژی پێنجشەممە، ٢ی جۆزەردان، لەگەڵ دوو چالاکی مەدەنیی کورد بە ناوەکانی "ئیدریس مینبەری و ڕێبوار مینبەری"، خەڵکی شاری سنە، لە لایەن هێزە ئیتلاعاتییەکانەوە دەسبەسەر کران.}

25/9/2019