^{رێكخراوێكی داكۆكیكار لە مافەكانی مرۆڤ رایگەیاند، مانگی رابردوو 31 چالاكوان لە لایەن هێزە ئەمنیەكانی ئێرانەوە لە رۆژهەڵاتی كوردستان دەستگیركراون.
كۆمەڵەی مافی مرۆڤی كوردستان، ئاماری پێشێلكاریەكانی مانگی ئابی بڵاوكردەوە و تیایدا رایگەیاند، لەو مانگەدا 31 چالاكوانی سیاسی و مەدەنی كورد لە لایەن هێزە ئەمنیەكانی ئێرانەوە دەستگیركراون.
بەم پێیەش كۆی ئەو چالاكوانانەی لەسەرەتای ئەمساڵەوە لە رۆژهەڵاتی كوردستان دەستبەسەركراون گەیشتە 235 كەس.
هەر بەپێی راپۆرتی ئەو رێكخراوە، لە مانگی رابردوودا 4 كۆڵبەر كوژراون و 7 كۆڵبەری تر و 3 كاسبكار و 3 هاوڵاتی تر بە تەقەی هێزە ئەمنیەكانی ئێران برینداربوون.
بەگوێرەی ئامارەكانی پێشتری كۆمەڵەی مافی مرۆڤی كوردستان لە سەرەتای ئەمساڵەوە تا ئێستا 60 كۆڵبەر كوژراون و 108 كۆڵبەر و كاسبكار و هاوڵاتیش بە تەقەی هێزە ئەمنیەكانی ئێران برینداربوون.
لە ئامارەكەی مانگی ئابدا ئاماژە بەوەكراوە لەو مانگەدا لانی كەم دوو هاوڵاتی كورد لە زیندانەكانی ئێران لە سێدارەدراون و بەم پێیەش ژمارەی ئەو هاوڵاتیە كوردانە لەسەرەتای ئەمساڵەوە سزای لەسێدارەدانیان بەسەردا جێبەجێ كراوە، گەیشتوەتە 31 كەس.}

4/9/2019